Kawayan Festival 2022
Narugian ti Kawayan Festival 2022 babaen iti Thanksgiving Mass nga inannong dagiti Messiah ita nga aldaw Abril 25. Timmabuno ti nasao a programa ti naayat nga ina iti ilitayo Hon. Wendy Joy D. Buquing, VM Melvin G. Macusi, miembro iti Sangguniang Bayan, dagiti empleado, kameng ti PNP/BFP, dagiti mangbukbukel iti DepEd ken opisiales iti Barangay. Daytoy ket serbisyo a pagyaman kadagiti timpuyog ken panagkaykaysa iti amin nga umili. Kasta met a dawatentayo iti pannarabay ni Apo a Namarsua iti nasayud ken nalinak a pannakarambak iti panagfiestatayo. Segun iti ina iti ili silulukat iti ruangan kadagiti amin a bisita nga umay makidanggay ken makitimpuyog kadagiti maangay nga aktibidad.
Naisaganad iti Flag Raising Ceremony. Kalpasanna, naangay iti pannakabendision dagiti Farm Tractors a naggapo iti pondo iti 7171 a maipaima kadagiti Barangay. Dakkel a tulong dagitoy kadagiti mannalon iti ilitayo a Sudipen para iti pakalag-anan dagitoy iti trabaho bayat iti panagtalonda. Kasta met a nabendisionan iti kaunaan a Food Processing Center ditoy ilitayo. Daytoy a pasdek ket mabalin nga usaren inton adda dagiti maangay a training maipanggep iti panagdiskubre wenno panagaramid dagiti makmakan nga mabalin a pangnegosyo wenno ipagpannakkel iti ilitayo.
