Flag Raising Ceremony iti umuna a Lunes iti bulan ti Abril

Naisayangkat ti Flag Raising Ceremony para iti umuna a Lunes iti bulan ti Abril nga indauluan ti Treasury Office. Nakipartisipar dagiti opisiales ken empleado ti LGU Sudipen ken nadumaduma a nasional nga ahensia ti gobierno, MESSIAH ken dagiti kakapitanes.
Naisaruno a naaramid ti panakabendision iti kabarbaro nga Ambulansia ti ilitayo a Sudipen nga indauluan ni Rev. Felimon Dawey ti kararag ken pammendesion.
Kalpasanna, naangay iti ababa a programa idiay MAOB Hall ket naiparang dagiti agkasangay ita a bulan, naikkanda ti regalo ken naikararagan met dagitoy babaen ken Pastor Michael Baoas. Kalpasanna, inbingay ti MESSIAH ti sao ti Apo babaen ken Rev. Jun Paplonot. Kasta met nga naiparang dagiti napermanente nga empleado ti ilitayo a Sudipen, GIP’s ken dagiti On-the-Job Trainees tayo.
Kamaudiananna, naangay iti binulan a panagtataripnong dagiti kameng ti Municipal Development Council (MDC) nga indauluan ti naayat nga ina ti ilitayo, Mayor Weng. Ditoy a naidatag dagiti nadumaduma nga aktibidad a maangay iti umadanin a panagFiesta iti ilitayo. Nataming dagiti pakaseknan ket naigunamgunam a kasapulan ti panagkaykaysa dagiti sektor tapno maileppasda dagitoy maigannuat a programa ken aktibidades ita a bulan.
“Ngarud, agkaykaysatayo tapno iti kasta maitedtayo ti nasayaat, naimpusuan ken napudno a serbisio kadagiti kakailiantayo para iti agtultuloy a panagdur-as ti nasudi nga ilitayo.” – Mayor Weng