Best in Innovative Bamboo Craft
“Nalabit a saan a makaay-ayo ti maysa a nalaga, nadirem ken kasla awan pategna a maipaspasuli a basket no maiyarig kadagiti napipintas a bags nga agdasar ken mailaklako kadagitoy a panawen; ngem kadagiti ammona ti mangbigbig, dakkel ti kaipapananna no maidilig kadagiti moderno a partuat.”-WDB
Naangay iti Pasiking, Labba Weaving ken Indigenous Bamboo Craft Making kas paset iti Rural Base Organization Day a nakipartisiparan dagiti sangapulo ket tallo (13) a beterano a lumalaga ditoy ilitayo a Sudipen. Timmabuno ti nasao a programa ti naayat nga ina iti ilitayo Hon. Wendy Joy D. Buquing, VM Melvin G. Macusi ken dagiti miembro iti Sangguniang Bayan. Bayat iti aktuwal a panaglaglada ket ob-obserbaran dagitoy dagiti nadutokan a hurados a pakairamanan da Ma’am Ayra Rose Reyes, Ma’am Salud Dalog, kenni Ma’am Conchita Virginia Amoyen.
Base dagiti obserabasyonda, naideklara kas Best in Innovative Bamboo Craft ti aramid ni Mrs. Mercy G. Macusi. Nagun-od met ni Mr. Leonardo Gundran iti Best in Labba Making kasta met a naiyalat ni Mr. Belmor Andrade iti Best in Pasiking Making. Gagem daytoy a pasantaken ti industria ti panaglaga (hand weaving) kasta met a mangguyugoy kadagiti kakailian nga interesado iti panagsuro tapno maaddaanda iti alternatibo a pamastrekan.
